Nakatutuwa ang paalalang ito na nabasa ko sa nasakyan kong dyip kaninang umaga. 

Ugali nga naman kasi ng ilang pinoy ang hindi magbayad. Dahil dito ay napakaraming mga paalala ang nagagawa ng mga kaibigan nating drayber para tiyakin na magbabayad ang kanilang mga pasahero bago bumaba. Ilan pa sa mga kakat'wang paalalang ito ay "mabangungot sana ang hindi magbayad" o kaya "magbayad ka, mahiya ka naman!"

Ang iba sa kanila ay isinasama pa ang misis sa pamamasada para s'yang maningil ng pamasahe. At kapag napaghinalaan kang hindi pa nagbabayad, titignan ka ng matalim mula ulo hanggang paa saka tatalikod at magpaparinig nang "yung mga wala pang bayad d'yan…"

Hindi lang sa dyip makikita ang eksenang ito kundi maging sa bus at ilang pampasaherong sasakyan. Kapalit ng kaunting barya ay ipinagkakait ng mga pasahero ang obligasyong moral sa serbisyong tinanggap. Tsk!

May hinaing din naman ako sa ilang mga drayber! Ang pinakamababang pamasahe o minimum fare ngayon (sa Maynila) ay P7.50 o higit na mataas sa ibang pampublikong sasakyan. Pero kapag sobra lang ng kaunti ang ibinayad ay hindi na ibinabalik ng ilan sa kanila ang sukli mo. Alam kong halos wala nang halaga ang barya ngayon dahil sa taas ng mga bilihin at bayad sa serbisyo. Nagiging koleksyon na lamang ito sa bahay. Pero hindi ba't dapat pa rin itong maging disiplina sa ating mga tsuper? Ang ilan sa kanila ay masama pa ang loob kapag siningil mo ang iyong sukli.

Pa'no kaya kapag tayo namang mga pasahero ang gumawa ng paalala: "makatulog sana habang nagda-drayb ang hindi magbalik ng sukli".

Hay naku mama, para na po d'yan sa tabi!!!